మెట్రో స్టేషన్ నుంచి ఆటోలో కిడ్నాప్ చేసి మహిళపై గ్యాంగ్ రేప్
మెట్రో స్టేషన్ లో నిరీక్షిస్తున్న ఓ మహిళను ఆటోలో కిడ్నాప్ చేసి ఆమెపై సామూహిక అత్యాచారం చేశారు. ఈ సంఘటన గురుగ్రామ్ లో జరిగింది. పోలీసులు నిందితులు ముగ్గురిని అరెస్టు చేశారు.
గురుగ్రామ్: సికిందర్ పూర్ మెట్రో స్టేషన్ లో నిరీక్షిస్తున్న ఓ మహిళను ముగ్గురు వ్యక్తులు ఆటోలో కిడ్నాప్ చేశారు. ఆ తర్వాత వజీరాబాద్ లోని ఓ గదికి తీసుకుని వెళ్లి ఆమెపై ముగ్గురిలో ఇద్దరు సామూహిక అత్యాచారం చేశారు. ఈ ముగ్గురు వ్యక్తులకు కూడా నేర చరిత్ర లేదు.
నిందితుల్లో భీవానీకి చెందిన ప్రదీప్ (25) ఓ ప్రైవేట్ సంస్థలో పనిచేస్తున్నాడు. 25 ఏళ్ల శ్యామ్ అనే వ్యక్తి బస్సు కండక్టర్ గా పనిచేస్తున్నాడు. మోహన్ లాల్ (27) కూడా ఓ ప్రైవేట్ సంస్థలో పనిచేస్తున్నాడు. ముగ్గురిని కూడా పోలీసులు అరెస్టు చేసి కేసు నమోదు చేశారు.
ఆ సంఘటన గురువారంనాడు చోటు చేసుకుంది. క్యాటరింగ్ జాబ్ చేస్తున్న మంగోల్పూర్ కు చెందిన మహిళ గురుగ్రామ్ కు వెళ్లింది. పని ముగిసిన తర్వాత ఇంటికి తిరిగి వెళ్లడానికి మెట్రో స్టేషన్ లో నిరీక్షిస్తోంది. దాదాపు రాత్రి 9 గంటల ప్రాంతంలో ఇద్దరు వ్యక్తులు ఆటోలో అక్కడికి వచ్చారు.
ఓ మిత్రుడిని అడిగి తెచ్చుకున్న ఆ ఆటోలో ప్రదీప్, మోహన్ లాల్ అనే ఇద్దరు ఆమెకు లిఫ్ట్ ఇస్తామని చెప్పారు. తాము ఢిల్లీకే వెళ్తున్నామని, తమ ఆటోలో రావచ్చునని ఆమెకు చెప్పారు. అయితే, ఆమె ఢిల్లీకి తీసుకుని వెళ్లకుండా వజీరాబాద్ లోని ఓ గదికి తీసుకుని వెళ్లారు.
అప్పటికే గదిలో ఓ వ్యక్తి ఉన్నాడు. అతన్ని శ్యామ్ గా ప్రదీప్ పిలిచాడు. మహిళపై తొలుత ప్రదీప్ ఆ తర్వాత శ్యామ్ అత్యాచారం చేశారు. ఎట్టకేలకు తాను తెల్లవారు జామున 1.55 గంటల ప్రాంతంలో పోలీసు కంట్రోల్ రూమ్ కు ఫోన్ చేయగలిగానని, వెంటనే పోలీసులు సంఘటనా స్థలానికి చేరుకుని వాంగ్మూలం రికార్డు చేశారని బాధితురాలు చెప్పింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
