బెల్లం, పప్పు, మెంతులతో నిర్మాణమా..! ప్రయాగరాజ్ ఈ పురాతన భవనం చాలా స్పెషల్ గురూ!!
ప్రయాగరాజ్ పట్టణాన్ని మహా కుంభమేళా కోసం సర్వాంగసుందరంగా తీర్చిదిద్దుతున్నారు. ఇందులో భాగంగానే 150 ఏళ్ల నాటి భవనాన్ని సరికొత్తగా బెల్లం, పప్పు, మెంతి వంటి సహజ పదార్థాలతో పునరుద్ధరిస్తున్నారు. ఈ ప్రాసెస్ ఏంటో చూద్దాం.
Followప్రయాగరాజ్ : మహా కుంభమేళా భారతదేశపు సనాతన సంప్రదాయంలో ఒక ముఖ్యమైన మత, సాంస్కృతిక ఉత్సవం. జనవరి 2025 లో ప్రయాగరాజ్‌లో జరగనున్న ఈ మహోత్సవాన్ని దివ్యంగా, భవ్యంగా నిర్వహించడానికి రాష్ట్ర ముఖ్యమంత్రి యోగి ఆదిత్యనాథ్ నేతృత్వంలోని ప్రభుత్వం కృషి చేస్తోంది. ఈ క్రమంలో కుంభ నగరి సాంస్కృతిక వారసత్వాన్ని కూడా సంరక్షిస్తున్నారు.
ప్రయాగరాజ్ లోని 150 ఏళ్ల నాటి నగర నిగమ భవనాన్ని పునరుద్ధరిస్తున్నారు. ప్రయాగరాజ్ నగరం ఒక మతపరమైన గుర్తింపుతో పాటు అనేక చారిత్రక, సాంస్కృతిక వారసత్వాలకు కేంద్రంగా ఉంది. నగర నిగమ ఆవరణలో ఉన్న భవనం కూడా ఈ వారసత్వంలో భాగం. ఈ భవనం పునరుద్ధరణ పనులను ప్రయాగరాజ్ అధికారులు చేపట్టింది. బ్రిటిష్ కాలంలో అంటే 1865 ప్రాంతంలో సంగమ నగరిలో నిర్మించిన పురాతన ‘గ్రేట్ నార్తన్’ హోటల్ ఇది... తర్వాతి కాలంలో నగర నిగమ కార్యాలయంగా మారింది.
ఈ 150 ఏళ్ల నాటి భవనాన్ని 9 కోట్ల రూపాయలతో పునరుద్ధరిస్తున్నారు. ఈ పునరుద్ధరణ తర్వాత ప్రయాగరాజ్ వాసులతో పాటు మహా కుంభమేళాకు వచ్చే పర్యాటకులు కూడా ఈ చారిత్రక భవనాన్ని చూడవచ్చు. ఈ పునరుద్దరణ పనులపై నగర కమిషనర్ చంద్ర మోహన్ గర్గ్ మాట్లాడుతూ... ఈ భవనం ప్రయాగరాజ్ వారసత్వ సంపద అని, దీన్ని సంరక్షించడానికి నగర నిగమ చర్యలు తీసుకుందని చెప్పారు. మహా కుంభానికి ముందు ఈ భవనం పునరుద్ధరణ పనులు పూర్తి చేస్తామని, కొత్త రూపులో ఈ భవనం పర్యాటకులను ఆకర్షిస్తుందని ఆయన అన్నారు.
ఈ చారిత్రక భవనంలో స్వాతంత్య్రానికి పూర్వం అనేక సమావేశాలు జరిగాయి. 1930 దశకంలో బ్రిటిష్ ప్రభుత్వం ఈ భవనాన్ని పరిపాలనా భవనంగా మార్చింది. ప్రయాగరాజ్ నగర నిగమ సివిల్ ఇంజనీరింగ్ విభాగ సలహాదారు సూరజ్ వి.ఎస్. మాట్లాడుతూ... డిసెంబర్ 2020 లో నగర నిగమ భవనంలో ఒక గది పైకప్పు కూలిపోయిందని, దీంతో ఈ భవనాన్ని పూర్తిగా కూల్చివేసి కొత్త భవనం నిర్మించాలని భావించామని చెప్పారు. ఈ 150 ఏళ్ల నాటి భవనాన్ని కూల్చివేసే ముందు పురావస్తు శాఖ అభిప్రాయం తీసుకున్నామని... ASI, MNNIT ప్రయాగరాజ్, IIT ముంబైలతో ఈ భవనం గురించి సంప్రదింపులు జరిపామని తెలిపారు. 2020-21 లో ASI నివేదిక వచ్చాక, నగర నిగమ భవనాన్ని వారసత్వ కట్టడంగా పేర్కొంటూ దీన్ని సంరక్షించాలని సూచించింది.
బెల్లం, పప్పు, మెంతితో గోడ నిర్మాణం
150 ఏళ్ల క్రితం ఈ భవనాన్ని పర్యావరణ అనుకూల పదార్థాలతో నిర్మించారు. కాబట్టి ఇప్పుడు కూడా అదే పద్ధతిలో పునరుద్ధరిస్తున్నారు. ఈ భవనంలో గతంలో మరమ్మతుల సమయంలో సిమెంట్ ప్లాస్టర్, ఫ్లోర్ టైల్స్, కిటికీలు, తలుపులు వంటి కొత్త పదార్థాలు వాడారు. ఇప్పుడు వాటిని తొలగిస్తున్నారు. దీంతో భవనం తన అసలు రూపాన్ని సంతరించుకుంటుంది. భవనంలో సహజంగా చల్లగా ఉంటుంది. వేసవిలో కూడా ఎయిర్ కండిషనర్ వాడకం తగ్గుతుంది. ఈ పద్ధతి పర్యావరణానికి కూడా మేలు చేస్తుంది. ఎందుకంటే ఇందులో సహజ పదార్థాలనే వాడుతున్నారు. ముంబైకి చెందిన సవానీ హెరిటేజ్ ఈ పునరుద్ధరణ పనులు చేపట్టింది. డిసెంబర్ నాటికి పనులు పూర్తి కావచ్చు. ఆ తర్వాత ఈ భవనంలో ‘ఫసాడ్ లైటింగ్’ ఏర్పాటు చేస్తారు. మహా కుంభమేళాకు వచ్చే పర్యాటకులు ఈ చారిత్రక భవనాన్ని కొత్త రూపులో చూడవచ్చు.
సవానీ హెరిటేజ్‌కు చెందిన జితేష్ పటేల్ మాట్లాడుతూ... నగర నిగమ పురాతన భవనం పునరుద్ధరణను పాతకాలంలో భవన నిర్మాణంలో వాడిన పదార్థాలతోనే చేపడుతున్నామని చెప్పారు. నిర్మాణ సామగ్రి కోసం సున్నాన్ని మధ్యప్రదేశ్‌లోని కట్నీ నుంచి, మిగతా వాటిని ఇతర రాష్ట్రాలు, స్థానిక మార్కెట్ల నుంచి తెప్పిస్తున్నామని తెలిపారు. సిమెంట్, ఇసుకకు బదులుగా సున్నం, సుర్ఖీ, ఇసుక, బెల్ గిరి, బెల్లం, పప్పు, గుగ్గిలం, మెంతి కలిపి నిర్మాణ సామగ్రిని తయారు చేస్తున్నారు. ఈ భవనం గురించి మరో ఆసక్తికరమైన విషయం ఏమిటంటే, ఒకప్పుడు ఈ భవనంలోనే ప్రయాగరాజ్ మ్యూజియం ఉండేది. మ్యూజియంతో సంబంధం ఉన్న ఆధారాలు ఇప్పటికీ ఈ భవనంలో ఉన్నాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
