రమేష్ కార్తిక్ నాయక్ తెలుగు కవిత: మాట్లా
రమేష్ కార్తిక్ నాయక్ రాసిన తెలుగు కవిత మాట్లాను ఏషియా నెట్ న్యూస్ పాఠకుల కోసం అందిస్తున్నాం.
 )
Followమాట్లాకి బయిట కొత్తగా చిగుర్లెస్తున్న తడి
తియ్యని కలల్ని గాలికి బహుకరిస్తుంది
మాట్లా లోపల సముద్రాల్ని
పటిక రాయి చిలికించి చిలికించి
నురగ పొంగులో నిశీధి మౌనాన్ని అల్లుతూ
నడిసముద్రంలో కరిగిపోతుంది
కరుగుతున్న బెల్లాన్ని
కళ్ళ పారదర్శకతలోంచి నిరీక్షిస్తూ
ఆమె ఎప్పుడు లెక్క వేసుకుంటుంది
సారాయి కాయడానికి తెచ్చిన ఎర్రమట్టి గడ్డి విత్తనాలకు పచ్చని రెక్కల్ని ఇచ్చింది కానీ
వాటి వేర్లను ఊపిరాడనివ్వకుండా మూటగట్టింది
మాట్లాలోని ఉక్కపోత
ఆమెని నిద్రపోనివ్వట్లేదు
ఆమె చేతి వేళ్ళకు ఉన్న ఉంగరాలకు చిగురించిన
కాసులు మొక్క జొన్నల్ని ఆరగిస్తుంటే
కాసుల కాంతి ఆమె చేతి రేఖల్ని చీల్చడానికి యత్నిస్తుంది
చీకట్లో భూమి నడకని కొలుస్తూ
మౌనంగా తనపై రాలిన నీడని
దొర్లిస్తూ
కదలిక లేని నాట్యాన్ని నర్తిస్తూ
నురగలు కక్కుతుంది మాట్లా
అతడు నిశి తవ్విన రూపకాల్ని
చంద్రుడి వైపు చల్లుతూ
తన దాహాన్ని
నక్షత్రాల మిణుకులోంచి పోగుచేసుకున్న వెండి ఇసుకతో
పూత పోసుకుంటాడు
మాట్లాలోని పొంగు మాయమౌతుంటుంది
సారాయి కోసం అతను తనని తాను తవ్వుకుని ఏ ములైన ఇంత మత్తు దొరుకుతుందేమో
అన్వేషిస్తాడు
ఆమె సూర్యుడు దించిన తెరపై
కొత్త చిత్రాన్ని సగంలోనే ఆపేసి ఇల్లు చేరుకుంటుంది
మాట్లా మాట్లాడకుండానే కూర్చుంటుంది
దానిలోపల చిక్కబడుతున్న తేనెని పలకరించే ఓపికలేక
ఇద్దరు ఆ నీలి మేఘాల
పుప్పోడిలో ధూళిలా మారిపోవడానికి
మాట్లానే ఇల్లనుకుని కారిపోవ
జారీపోతారు
మాట్లా చుట్టూ తిరగడానికి
సూర్యచంద్రులు ఇప్పుడు తండాలోకి రావచ్చు
* సారాయి తయారీకి బెల్లం పటిక నీళ్లలో కలిపి పులియపెట్టే కుండ
మరింత సాహిత్యం కోసం క్లిక్ చేయండి: https://telugu.asianetnews.com/literature
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
