ఎంతో రుచికరమైన వేడి వేడి చికెన్ మసాలా గారెలు ఎలా తయారు చేయాలో తెలుసా?
చల్లని సాయంత్రం వేళ ఒక మంచి స్నాక్స్ తినాలనిపిస్తుంది. అలాంటప్పుడు వేడి వేడిగా చికెన్ గారెలు (Chicken masala garelu) తయారు చేసుకోండి. మనం ఎప్పుడూ చికెన్ 65, చికెన్ కబాబ్, చికెన్ కర్రీ, చికెన్ బిర్యాని ట్రై చేస్తుంటాం. అయితే చికెన్ తో గారెలు తయారు చేసుకోండి ఎంతో రుచిగా ఉంటాయి. ఈ గారెల తయారీ విధానం సులభం. ఈ స్నాక్ ఐటం మీ పిల్లలకు నచ్చుతుంది. ఇంకెందుకు ఆలస్యం ఇప్పుడు ఈ ఆర్టికల్ (Article) ద్వారా చికెన్ గారెలు ఏ విధంగా తయారు చేసుకోవాలో తెలుసుకుందాం.
చికెన్ గారెల తయారీకి కావలసిన పదార్థాలు: ఒక కప్పు సెనగపప్పు (Chana dal), పావు కేజీ బోన్ లెస్ చికెన్ (Boneless chicken ), అరచెంచా పసుపు (Turmeric), మీ రుచికి సరిపడా కారం (Red chilli powder), రెండు పచ్చిమిరప కాయలు (Green chillies), ఒక పెద్ద ఉల్లిపాయ (Onion), పుదీనా తరుగు (Mint), కొత్తిమీర (Coriyander ) తరుగు
ఒక టేబుల్ స్పూన్ అల్లం వెల్లుల్లి పేస్టు (Ginger garlic paste), తరిగిన కరివేపాకు (Curries), అరచెంచా గరంమసాలా (Garam masala), రెండు టేబుల్ స్పూన్ ల బియ్యప్పిండి (Rice flour), 1 స్పూను జీలకర్ర (Cumin), ఒక టీస్పూన్ ధనియాలపొడి (Coriyander powder), ఢీ ఫ్రై కి సరిపడు నూనె (Oil).
తయారీ విధానం: ముందుగా ఒక కప్పు సెనగపప్పును నాలుగు గంటల పాటు నానబెట్టుకోవాలి. ఇలా నాన పెట్టుకున్న (Soaked) సెనగపప్పును కుక్కర్ (Cooker) లో వేసి రెండు విజిల్స్ వచ్చేంత వరకూ పలుకుగా ఉడికించుకోవాలి. ఇలా ఉడికించుకున్న సెనగపప్పును నీళ్లు పూర్తిగా వంపేసి ఒక గిన్నెలో తీసుకోవాలి. ఇప్పుడు బోన్ లెస్ చికెన్ ను కుక్కర్ లో వేసుకోవాలి.
ఇందులో కారం, ఉప్పు, పసుపు, ధనియాల పొడి కొన్ని నీళ్ళు వేసి మూడు విజిల్స్ వచ్చేంత వరకూ మీడియం మంట మీద ఉడికించుకోవాలి. కుక్కర్ విజిల్ ఆవిరి పోయాక మూత తీసి చికెన్ (Chicken) ను ఒక ప్లేట్ లో తీసుకుని పొడి చేసుకోవాలి. సెనగపప్పును మిక్సీ జార్ లో వేసి నీళ్లు పోయకుండా బరకగా మిక్సీ పట్టుకోవాలి. సెనగపప్పు మిశ్రమాన్ని ఒక గిన్నెలో (Bowl) తీసుకోవాలి.
ఇందులో పొడి చేసుకున్న చికెన్, ఉల్లిపాయలు ముక్కలు, పచ్చిమిర్చి ముక్కలు, ఉప్పు, అల్లం వెల్లుల్లి పేస్ట్, కట్ చేసుకున్న కరివేపాకు, కారం, గరం మసాలా, జీలకర్ర వేసి బాగా కలుపుకోవాలి (Mix well). ఇందులో రెండు టేబుల్ స్పూన్ ల నీళ్లు, తరిగిన పుదీనా, కొత్తిమీర వేసి బాగా కలుపుకోవాలి. గారెలు విరగకుండా ఉండేందుకు రెండు టేబుల్ స్పూన్ల బియ్యప్పిండి (Rice flour) వేసి మరొకసారి గారెల పిండిని బాగా కలుపుకోవాలి.
ఇప్పుడు ఢీ ఫ్రై కోసం స్టవ్ మీద బాండ్లీ పెట్టి ఢీ ఫ్రైకి సరిపడా నూనె (Oil) వేసి వేడిచేసుకోవాలి. నూనె వేడెక్కిన తర్వాత పిండిని చేత్తో గారెలుగా ఒత్తుకుని నూనెలో వేయాలి. మీడియం మంట మీద గారెలను మంచి కలర్ వచ్చేంత వరకూ వేయించుకోవాలి. ఇలా వేయించుకున్న గారెలను ఒక ప్లేట్లోలో తీసుకుని సర్వ్ (Serve) చేయండి. అంతే ఎంతో రుచికరమైన వేడి వేడి చికెన్ మసాలా గారెలు రెడీ (Ready).