నావి మొత్తం దొంగిలిస్తున్నారు.. విలక్షణ నటుడిపై సమంత క్యూట్ కామెంట్!
విలక్షణ నటుడిపై సమంత క్యూట్ కామెంట్ చేసింది. మొత్తం నావే దొంగిలిస్తున్నారంటూ ఫన్నీ కామెంట్ చేసింది. ఆ క్షణం కోసం తాను ఎదురుచూస్తున్నానంటూ ప్రశంసలు కురిపించింది సామ్. ఇంతకి కథేంటో చూస్తే..
సమంత, విలక్షణ నటుడు మనోజ్ భాజ్పాయ్ కలిసి `ది ఫ్యామిలీ మ్యాన్ 2` వెబ్ సిరీస్లో నటించారు. ప్రియమణి మరో ముఖ్య పాత్ర పోషిస్తున్నారు. ఇటీవల విడుదలైన ఈ వెబ్ సిరీస్ ట్రైలర్ ఆకట్టుకోవడంతోపాటు అనేక సంచలనాలు క్రియేట్ చేసింది. ఇది 50మిలియన్స్ కి పైగా వ్యూస్ని రాబట్టింది.
అదే సమయంలో బోలెడన్నీ వివాదాలు తెచ్చిపెట్టింది. తమిళులు సమంతని ట్రోల్స్ చేశారు. ఎల్టీటీఈ సంస్థని టెర్రరిస్ట్ లుగా చిత్రీకరించడాన్ని వారు వ్యతిరేకిస్తున్నారు. దీనిపై సమంత కూడా పరోక్షంగా స్పందించింది. ఎల్టీటీఈకి సంబంధించిన సీన్లని తొలగించి ట్రైలర్ని మళ్లీఅప్లోడ్ చేశారు.
ఈ వెబ్ సిరీస్ జూన్ 4న అమెజాన్ ప్రైమ్లో విడుదల కాబోతుంది. ఈ నేపథ్యంలో ప్రమోషన్లో పాల్గొంటున్నారు సమంత. అందులో భాగంగా నటుడు మనోజ్ భాజ్పాయ్పై ఆమె క్యూట్ కామెంట్ చేశారు. అన్నీ దొంగిలిస్తున్నారట.
ఆ వివరాల్లోకి వెళితే, మనోజ్ భాజ్పాయ్ ఇటీవల ఓ మీడియాతో ముచ్చటిస్తూ, సమంతపై ప్రశంసలు కురిపించారు. `చెన్నైలో షూటింగ్ కోసం అడుగుపెట్టే సమయానికి సమంత అన్ని రకాలుగా రెడీ అయి ఉన్నారు. మార్షల్ ఆర్ట్స్ నేర్చుకుని, ఫిజికల్గానూ ట్రైన్ అయి ఉన్నారు. ఆమెని చూసి నాకు కొద్దిగా భయమేసింది. ఆమె సిద్ధంగా ఉన్నారు. నేనింకా ఏమీ మొదలుపెట్టనే లేదు అని! మళ్లీ నేను రిహార్సల్స్ చేయాల్సి ఉంటుందేమోనని అనుకున్నా` అని మనోజ్ చెప్పుకొచ్చాడు.
దీనిపై సమంత స్పందించింది. `ఓ మై గాడ్.. అవన్నీ నా మాటలే. వాటిని మీరు దొంగిలిస్తున్నారు. మీరు గొప్ప నటులు. `ఫ్యామిలీ మ్యాన్ 2` సీజన్లో మీరు ఎంత అద్భుతంగా నటించారనేది ప్రేక్షకులు చూసి తీరాల్సిందే. ఆ క్షణం కోసం నేను ఎదురు చూస్తూ ఉంటాను` అని సమంత ట్వీట్ చేసింది.
రాజ్ అండ్ డీకే దర్శకత్వం వహించిన ఈ సిరీస్లో సమంత, మనోజ్ భాజ్పాయ్లతోపాటు ప్రియమణి, షరీబ్ హష్మి, శరద్ కేల్కర్, శ్రేయా ధన్వంతరి ముఖ్య పాత్రలు పోషించారు.
సమంత ప్రస్తుతం `శాకుంతలం` చిత్రంలో నటిస్తుంది. ఇందులో ఆమె శకుంతలగా మెయిన్ లీడ్ చేస్తుంది. గుణశేఖర్ దర్శక, నిర్మాణంలో రూపొందుతున్న చిత్రమిది.
దీంతోపాటు తమిళంలో నయనతార ప్రియుడు విగ్నేష్ శివన్ రూపొందిస్తున్న `కాతు వాకుల రెండు కాదల్` చిత్రంలో నయనతార, విజయ్ సేతుపతిలతో కలిసి నటిస్తుంది సామ్.