నాగశౌర్య - మాళవికా నాయర్ జంటగా ‘ఫలానా అబ్బాయి ఫలానా అమ్మాయి’.. ఆకట్టుకుంటున్న ఫస్ట్ లుక్ పోస్టర్!

యంగ్ హీరో నాగశౌర్య - నటుడు, దర్శకుడు అవసరాల శ్రీనివాస్ కాంబోలో ‘ఫలానా అబ్బాయి ఫలానా అమ్మాయి’ చిత్రం రాబోతోంది. చిత్ర యూనిట్ తాజాగా విడుదల చేసిన ఫస్ట్ లుక్ పోస్టర్ ఆకట్టుకుంటోంది.  

టాలీవుడ్ యంగ్ హీరో నాగశౌర్య (Naga Shaurya) దర్శకుడు శ్రీనివాస్ అవసరాల కలిసి గతంలో 'ఊహలు గుసగుసలాడే', 'జ్యో అచ్యుతానంద' అనే రెండు గుర్తుండిపోయే చిత్రాలను అందించిన విషయం తెలిసిందే. ఈ రెండు చిత్రాలూ వారిలోని ఉత్తమ ప్రతిభను బయటకు తీసుకొచ్చాయి. థియేటర్లలో ఎంతగానో ఆకట్టుకున్న ఈ చిత్రాలు.. టీవీ, ఓటీటీ లలో ఇప్పటికీ గొప్ప ఆదరణ పొందుతున్నాయి. 

ప్రస్తుతం ఫీల్ గుడ్ రొమాంటిక్  ఫిల్మ్ 'ఫలానా అబ్బాయి ఫలానా అమ్మాయి' (PAPA)తో నాగశౌర్య-శ్రీనివాస్ అవసరాల హ్యాట్రిక్ విజయాన్ని అందుకోవడానికి సిద్ధమవుతున్నారు. ఈ సందర్భంగా మూవీ ఫస్ట్‌లుక్‌ను తాజాగా విడుదల చేశారు. నాగ శౌర్య, మాళవిక నాయర్ ఇద్దరూ ఫార్మల్ వింటర్‌వేర్ ధరించి, ప్రయాణంలో ఒకరిపై ఒకరు వాలిపోయి సంగీతం వింటూ కనిపించారు. పోస్టర్ లో అందమైన వస్త్రధారణతో, అంతకంటే అందంగా ఉన్న ఆ జంటను చూస్తుంటే.. ఈ ఫీల్ గుడ్ ఫిల్మ్ ను ఎప్పుడెప్పుడు చూస్తామా అనే ఆసక్తి కలగక మానదు.

నిన్న ఫస్ట్ లుక్ అనౌన్స్‌మెంట్ వీడియోను కూడా విడుదల చేసి మంచి రెస్పాన్స్ ను దక్కించుకున్నారు. ఆ వీడియోలో శ్రీనివాస్ అవసరాలతో కాల్ మాట్లాడిన హీరోహీరోయిన్లు సినిమా గురించి ఎటువంటి అప్‌డేట్‌లు లేకపోవడంపై చర్చించారు. ‘ఆర్ఆర్ఆర్ కూడా విడుదలైంది’ అని శౌర్య అనగా.. ‘ఆర్ఆర్ఆర్ లో మూడే అక్షరాలు ఉన్నాయని, ఫలానా అబ్బాయి ఫలనా అమ్మాయి(PAPA)లో నాలుగు అక్షరాలు ఉన్నాయి’ అందుకే కాస్తా ఆలస్యం అంటూ శ్రీనివాస్ అవసరాల సరదాగా బదులిచ్చారు. 

అయితే, దర్శకుడు శ్రీనివాస్ అవసరాల చేతిలో ఓ పుస్తకాన్ని గమనించే ఉంటారు. ఈ బుక్ ను ‘హిచ్ కాక్ నుంచి నోలన్ దాకా’ అనే టైటిల్ తో మూడు భాగాలుగా ప్రచురితం చేశారు. ‘జాతిరత్నాలు’, ‘ప్రిన్స్’ సినిమాలకు రచన సహకారం అందించిన రైటర్, సీనియర్ సినిమా జర్నలిస్ట్ జోశ్యుల సూర్య ప్రకాష్ (Surya Prakash) ఈ పుస్తకాన్ని రచించారు. యావత్ సినీలోకం మెచ్చిన చిత్రాలను ప్రేక్షకులకు పరిచయం చేసేందుకు.. ప్రపంచ సినిమాలపై విశ్లేషాత్మకంగా రాసిన వ్యాసాలను ఇలా పుస్తక రూపంలో తీసుకువచ్చారు. ఈ పుస్తకాన్ని హీరోయిన్స్ అనుపమా పరమేశ్వరన్, లావణ్య త్రిపాఠి, డైరెక్టర్ వంశీతో పాటు తదితర ఆర్టిస్టులు చదవటం విశేషం. 

ఇక 'ఫలానా అబ్బాయి ఫలానా అమ్మాయి' అనేది ఒక దశాబ్దం పాటు ఓ జంట మధ్య సాగే ప్రేమ ప్రయాణం. హెచ్చు తగ్గులతో కూడిన ఆ ప్రయాణం ఎంతో ఆసక్తికరంగా ఉంటుంది. ఈ చిత్రం 18 సంవత్సరాల నుండి 28 సంవత్సరాల వయస్సు వరకు సాగే వారి ప్రయాణంలోకి ప్రేక్షకులను తీసుకువెళుతుంది. ఇందులో ప్రేమ సన్నివేశాలు చాలా సహజంగా హృదయాన్ని హత్తుకునేలా ఉంటాచని, ప్రేమను ఇంద్రధనస్సు లాగా ఏడు విభిన్న రంగులలో ప్రదర్శించబోతున్నట్లు దర్శకుడు తెలిపారు. 

గతంలో నాగశౌర్య-శ్రీనివాస్ అవసరాల కలయికలో వచ్చిన రెండు చిత్రాలకు అద్భుతమైన సంగీతం అందించిన కళ్యాణి మాలిక్, 'ఫలానా అబ్బాయి ఫలనా అమ్మాయి'కి సంగీతం అందిస్తుండటం విశేషం. ఈ సినిమా చిత్రీకరణ ఇటీవలే పూర్తయింది. విడుదల తేదీతో పాటు సినిమాకి సంబంధించిన మరిన్ని వివరాలు త్వరలో వెల్లడి కానున్నాయి. పీపుల్ మీడియా ఫ్యాక్టరీ, దాసరి ప్రొడక్షన్స్ సంయుక్తంగా నిర్మిస్తున్నారు. 'కళ్యాణ వైభోగమే' చిత్రంతో వెండితెరపై మ్యాజిక్‌ చేసిన హిట్ పెయిర్ నాగశౌర్య, మాళవిక నాయర్ (Malvika Nair) హీరో హీరోయిన్లుగా నటిస్తున్నారు.