రికార్డులు సృష్టిస్తూ, ఆస్ట్రేలియాను వణికిస్తూ... రెండో టెస్టుకే టీమిండియాలో ఎంత మార్పు...

మొదటి టెస్టులో 36 పరుగులకే ఆలౌట్ అయిన జట్టు... తొలి టెస్టులో ఏకైక హాఫ్ సెంచరీ చేసిన విరాట్ కోహ్లీ కూడా లేడు. షమీ గాయం కారణంగా తప్పుకున్నాడు, రెండో ఇన్నింగ్స్‌ ఆరంభంలోనే ఉమేశ్ యాదవ్ గాయంతో తప్పుకున్నాడు. సీనియర్ పేసర్ ఇషాంత్ శర్మ అందుబాటులో లేడు, రోహిత్ శర్మ ఆడడం లేదు... ఇన్ని సమస్యలున్నా, స్టార్లు లేకున్నా... టాప్ టీమ్ ఆస్ట్రేలియాను వణికిస్తూ ఆస్ట్రేలియా టూర్‌లో తొలి టెస్టు విజయాన్ని అందుకుంది టీమిండియా.

ఆడిలైడ్ పీడకల నుంచి జట్టును పడేయగలిగాడు అజింకా రహానే. రహానే కూల్ అండ్ కామ్ యాటిట్యూడ్... టీమిండియాలోనే కాదు, భారత అభిమానుల్లోనూ తెలియని ఉత్సాహాన్ని నింపింది...

బౌలర్లకు తగ్గట్టుగా ఫీల్డింగ్ మార్చడం, బ్యాట్స్‌మెన్‌కి తగ్గట్టుగా బౌలింగ్‌లో మార్పులు చేయడం... వికెట్లు రాకపోయినా సహనంతో ఉండమని బౌలర్లకి సలహాలు ఇచ్చి జట్టులో ఉత్తేజం తీసుకొచ్చాడు రహానే...

తొలి టెస్టు ఆడుతున్న మహ్మద్ సిరాజ్‌ను మొదటి రోజు ఆట ముగిసిన తర్వాత జట్టును ముందుండి నడిపించమని ఆహ్వానించడం అజింకా రహానే కెప్టెన్సీ స్కిల్స్‌కి పర్ఫెక్ట్ ఉదాహరణ...

అదీకాకుండా జట్టులోకి వచ్చిన శుబ్‌మన్ గిల్, మహ్మద్ సిరాజ్ తమకు వచ్చిన అవకాశాన్ని చక్కగా వాడుకున్నారు... తొలి ఇన్నింగ్స్‌లో సున్నాకే మయాంక్ అగర్వాల్ అవుటైనా ఆ ఒత్తిడి తీసుకోకుండా బ్యాటింగ్ చేశాడు గిల్.

65 బంతుల్లో 8 ఫోర్లతో 45 పరుగులు చేసిన గిల్... బ్యాటింగ్ ఆర్డర్‌లో పాజిటివ్‌నెస్ నింపాడు. రెండో ఇన్నింగ్స్‌లో మయాంక్ త్వరగా అవుటైనా దూకుడు కొనసాగించి, లాంఛనాన్ని పూర్తిచేశాడు.

అంపైర్స్ కాల్స్ కారణంగా టీమిండియా బాగా నష్టపోయింది. దాదాపు 5 సార్లు అంపైర్స్ కాల్ నిబంధన కారణంగా భారత బౌలర్లకు వికెట్లు దక్కలేదు. అయినా నిరుత్సాహపడకుండా బౌలర్లను ప్రోత్సాహించాడు రహానే.

ఆస్ట్రేలియాపై మొదటి టెస్టు ఆడుతూ 5 వికెట్లు తీసిన నాలుగో ఆసియా ప్లేయర్‌గా నిలిచాడు సిరాజ్. టీమిండియా తరుపున రెండో బౌలర్. ఇంతకుముందుకు సయ్యద్ అబిద్ ఆలీ 1967లో ఈ ఫీట్ సాధించాడు. ఆలీ కూడా హైదరాబాద్‌కి చెందినవాడే కావడం విశేషం.

మెల్‌బోర్న్ క్రికెట్ స్టేడియంలో భారత జట్టుకి ఇది నాలుగో విజయం... మెల్‌బోర్న్‌లో ఆస్ట్రేలియాపై  ఇంగ్లాండ్ తర్వాత అత్యధిక విజయాలు అందుకున్న జట్టు టీమిండియానే.

గత ఆరు టెస్టుల్లో ఒక్క ఆస్ట్రేలియా బ్యాట్స్‌మెన్ కూడా సెంచరీ చేయలేకపోయాడు. అదే టీమిండియా తరుపున పూజారా మూడు, కోహ్లీ, పంత్, రహానే ఒక్కో సెంచరీ చేశారు...

బాక్సింగ్ డే టెస్టులో ఒక్క ఆసీస్ బ్యాట్స్‌మెన్ కూడా 50+ స్కోరు చేరుకోలేకపోయాడు. 1988లో విండీస్‌పై టెస్టు తర్వాత ఆస్ట్రేలియా ఇలాంటి చెత్త ప్రదర్శన ఇవ్వడం ఇదే తొలిసారి.

గత 12 టెస్టు ఇన్నింగ్స్‌ల్లో ఆస్ట్రేలియాను 10 సార్లు ఆలౌట్ చేశారు భారత బౌలర్లు... ఈ మధ్యకాలంలో ఆసీస్‌పై ఇలాంటి ప్రదర్శన ఇచ్చింది భారత జట్టే...

అత్యధిక లెఫ్ట్ హ్యాండ్ ప్లేయర్లను అవుట్ చేసిన బౌలర్‌గా చరిత్ర సృష్టించాడు రవిచంద్రన్ అశ్విన్... 192 మంది ఎడమ చేతి బ్యాట్స్‌మెన్, అశ్విన్ బౌలింగ్‌లో అవుట్ అయ్యారు... మురళీధరన్ 191 మంది లెఫ్ట్ హ్యాండ్ బ్యాట్స్‌మెన్ రికార్డును అధిగమించాడు అశ్విన్.

టీమిండియాతో టెస్టు మ్యాచ్‌లో ఆసీస్ బ్యాట్స్‌మెన్ ఎవ్వరూ హాఫ్ సెంచరీ కూడా చేయలేకపోవడం ఇదే తొలిసారి. ఇంతకుముందు ఇంగ్లాండ్‌పై మూడు సార్లు, సౌతాఫ్రికా, విండీస్‌పై ఓసారి ఇలా ఆలౌట్ అయ్యింది ఆస్ట్రేలియా.

బాక్సింగ్ డే టెస్టులో 1.93 రన్‌రేటుతో పరుగులు చేసింది ఆస్ట్రేలియా. స్వదేశంలో ఆసీస్‌కి ఇదే అత్యల్పం. 1978లో చివరిసారిగా ఇలాంటి చెత్త రికార్డు నమోదుచేసింది ఆస్ట్రేలియా.

స్వదేశంలో వరుసగా కనీసం ఓ హాఫ్ సెంచరీతో 176 విజయాలు అందుకుంటూ వస్తున్న ఆస్ట్రేలియా, నేటి మ్యాచ్‌తో ఆ రికార్డును కోల్పోయింది. 

నాలుగో ఇన్నింగ్స్‌లో లక్ష్యాన్ని చేధించి విజయాన్ని అందుకోవడం మెల్‌బోర్న్‌లో టీమిండియాకి ఇదే తొలిసారి. ఆస్ట్రేలియాలో రెండోసారి. ఇంతకుముందు రాహుల్ ద్రావిడ్ విన్నింగ్ షాట్ కొట్టగా, నేటి మ్యాచ్‌లో రహానే విన్నింగ్ షాట్ ఆడాడు.

మెల్‌బోర్న్‌లో నాలుగు ఇన్నింగ్స్‌ల్లో 15 వికెట్లు తీశాడు జస్ప్రిత్ బుమ్రా. కుంబ్లే, కపిల్ దేవ్ రికార్డులను అధిగమించాడు బుమ్రా...

2020లో మొట్టమొదటి టెస్టు సెంచరీ చేసిన భారత బ్యాట్స్‌మెన్‌గా రికార్డు క్రియేట్ చేసిన రహానే, ఈ ఏడాది టెస్టుల్లో భారత జట్టుకి తొలి విజయాన్ని అందించాడు.

ధోనీ తర్వాత మొదటి మూడు టెస్టుల్లో విజయాలను అందుకున్న రెండో భారత కెప్టెన్ అజింకా రహానే. ధోనీ మొదటి నాలుగు టెస్టుల్లో విజయాలను అందుకున్నాడు...

1996 నుంచి ఆడిన 50 టెస్టుల్లో 21 టెస్టుల్లో టీమిండియా విజయం అందుకుంది. ఆస్ట్రేలియా 19 మ్యాచుల్లో గెలవగా, 10 మ్యాచులు డ్రాగా ముగిశాయి.

2010 తర్వాత మొదట ఫీల్డింగ్ చేసి, విజయాన్ని అందుకోవడంఇదే తొలిసారి. చివరిసారిగా కొలంబో టెస్టులో శ్రీలంకపై మొదట ఫీల్డింగ్ చేసి విజయాన్ని అందుకుంది టీమిండియా...