టమాటా, ఉల్లితో పోటీపడుతున్న చిక్కుడు... ధర ఎంతో తెలుసా?

కూరగాయల ధరలు కొంటే కాదు వింటేనే సామాన్యుడి జేబుకు చిల్లు పడేలా వుంది. పల్లెల్లో కాస్త నయం... హైదరాబాద్ లో ధరలు కొండెక్కాయి. 
 

కొద్దిరోజుల క్రితం ఉల్లిపాయలు, టమాటా ధరలు మండిపోయాయి. ఓ సమయంలో కిలో 100 రూపాయలు పలికాయి. ఇప్పుడు వాటి ధరలు తగ్గాయి. 
 

అయితే ఇప్పుడు చిక్కుడు వంతు వచ్చింది. టమాటా, ఉల్లి ధరలతో పోటీపడుతూ చిక్కుడు ధర పెరుగుతోంది. 
 

ప్రస్తుతం హైదరాబాద్ లో చిక్కుడు హోల్ సేల్ మార్కెట్ ధర 40‌-60 రూపాయల వరకు వుంది. ఇది మార్కెట్ లోకి వచ్చేసరికి కిలో రూ.70-80 పలుకుతోంది. 

ఈ చిక్కుడు ధర పెంపు చూస్తుంటే త్వరలోనే సెంచరీ కొట్టే అవకాశం కనిపిస్తోంది. అంటే ఇప్పటికే సామాన్యులకు కాస్త దూరమైన చిక్కుడు మరింత దూరం కానుందన్నమాట. 

ఇక చిక్కుడు లాగే మునగకాయ ధర కూడా చాలా ఎక్కువగా వుంది. కిలో మునగకాయ 120-170 రూపాయల వరకు వుంది. 
 

పచ్చిమిర్చి ధర కూడా చాలా ఎక్కువగా వుంది.  మార్కెట్ లో కిలో మిర్చి ధర 50-60 రూపాయలుగా వుంది. 

బంగాళాదుంప రూ.40, క్యాప్సికమ్ రూ.45, కాకరకాయ రూ.40, క్యారెట్ రూ.50,వంకాయలు రూ.35-40, బెండకాయలు రూ.40 ధర పలుకుతోంది. 

ప్రధాన కూరగాయల ధరలే కాదు ఆకుకూరల ధరలు కూడా అలాగే వున్నాయి. పాలకూర నుండి కరివేపాకు వరకు ప్రతి ఒక్కటి సామాన్యుడికి చుక్కలు చూపిస్తోంది. 

హైదరాబాద్ లో కూరగాయాల ధరలు చూసి సామాన్యుడు బెంబేలెత్తిపోతున్నాడు. బయట మార్కెట్ లోనే ఇలా ధరలు మండిపోతుంటే షాపింగ్ మాల్స్, షాప్స్ లో ఈ ధరలు మరింత ఎక్కువగా వున్నాయి.