Oct 20, 2022, 1:59 PM IST
జగిత్యాల : తాగిన మైకంలో ఇద్దరు యువకులు కారు నడిపి ఓ వృద్దురాలి ప్రాణాలమీదకు తెచ్చారు. రోడ్డుపక్కన గుడిసెలో నిద్రిస్తున్న మహిళపైకి కారు దూసుకెళ్లిన దుర్ఘటన జగిత్యాల జిల్లాలో బుధవారం అర్ధరాత్రి చోటుచేసుకుంది. జగిత్యాల పట్టణానికి చెందిన చందు, రాజు ఫుల్లుగా మద్యం సేవించి కారులో ఎస్కెఆర్ చౌరస్తా వైపు వెళ్లారు. అయితే మద్యంమత్తులో డ్రైవింగ్ చేయడంతో వేగంగా వెళుతూ అదుపుతప్పిన కారు ధర్మపురి రోడ్డులోని డిగ్రీ కాలేజీ వద్ద ఓ గుడిసెలోకి దూసుకెళ్లింది. దీంతో యువకులిద్దరితో పాటు గుడిసెలో నిద్రిస్తున్న శంకరమ్మ అనే వృద్దురాలికి కూడా తీవ్ర గాయాలయ్యాయి. వెంటనే ముగ్గురిని చికిత్స నిమిత్తం ప్రభుత్వాస్పత్రికి తరలించారు. పోలీసులు ఘటనాస్థలాన్ని పరిశీలించి దర్యాప్తు చేపట్టారు.