ఫ్లిప్​కార్ట్ కు కేంద్రం షాక్..ఫుడ్ బిజినెస్ అనుమతికి కేంద్రం నిరాకరణ..

దేశీయ ఆహార ఉత్పత్తుల రిటైల్​ రంగంలోకి ప్రవేశించాలన్న ఈ-కామర్స్​ దిగ్గజం ఫ్లిప్​కార్ట్​ ప్రయత్నాలకు కేంద్రం బ్రేక్​ వేసింది. అనుమతుల కోసం చేసుకున్న దరఖాస్తును తిరస్కరించింది. నియంత్రణ విషయంలో సమస్యలు తలెత్తుతాయని స్పష్టం చేసింది.  

న్యూఢిల్లీ: ఆహార ఉత్పత్తుల రిటైల్​ రంగంలోకి ప్రవేశించడానికి అనుమతులు కోరుతూ చేసిన ప్రతిపాదనను కేంద్ర ఆర్థిక మంత్రిత్వశాఖ పరిధిలోని ప్రమోషన్​ ఆఫ్​ ఇండస్ట్రీ, ఇంటర్నల్​ ట్రేడ్​ విభాగం (డీపీఐఐటీ) తిరస్కరించింది. నియంత్రణ విషయంలో సమస్యలు తలెత్తుతాయని పేర్కొంది. 

గతంలోనే ఆహార ఉత్పత్తుల రిటైల్​ రంగంలోకి 100 శాతం విదేశీ ప్రత్యక్ష పెట్టుబడులకు కేంద్రం అనుమతులు ఇచ్చింది. ఈ నేపథ్యంలో ఫుడ్ బిజినెస్ రంగంలోకి ప్రవేశించేందుకు గతేడాది 'ఫ్లిప్​కార్ట్​ ఫార్మర్​మార్ట్​' పేరిట స్థానిక విభాగాన్ని స్థాపించింది.  అనుమతుల కోసం కేంద్ర ప్రభుత్వానికి దరఖాస్తు చేసుకుంది.

తమ ప్రతిపాదనను కేంద్రం తిరస్కరించిన నేపథ్యంలో మరోమారు దరఖాస్తు చేసుకుంటామని ఫ్లిప్ కార్ట్ సంస్థ ప్రతినిధి ఒకరు తెలిపారు. సాంకేతికత, కొత్త ఆవిష్కరణల ఆధారంగా నడిచే మార్కెట్​లో పారదర్శకత, విలువల సామర్థ్యం పెంచటం ద్వారా దేశీయ రైతులు, ఫుడ్​ ప్రాసెసింగ్​ రంగానికి దన్నుగా నిలుస్తుందని భావిస్తున్నట్లు తెలిపారు. 

తాము చేపట్టే ఫుడ్ బిజినెస్ ద్వారా రైతుల ఆదాయం పెరిగి, భారత వ్యవసాయ రంగంలో మార్పులు చోటు చేసుకుంటాయని ఫ్లిప్ కార్ట్ ప్రతినిధి అన్నారు. భారత్​లో ఆహార ఉత్పత్తుల రిటైల్​ రంగంలో సుమారు 500 మిలియన్​ డాలర్లు పెట్టుబడులు పెట్టేందుకు అమెజాన్​కు 2017లోనే కేంద్రం  అనుమతి ఇచ్చింది.

రిలయన్స్ జియో మార్ట్ పేరిట రిలయన్స్ చేపట్టిన రిటైల్ ఈ-కామర్స్ బిజినెస్, సాఫ్ట్ బ్యాంక్ దన్నుతో నడుస్తున్న సాఫ్ట్ బ్యాంక్, అలీ బాబా సారథ్యంలోని బిగ్ బాస్కెట్, అమెజాన్ భారత్ యూనిట్లకు ఫ్లిప్ కార్ట్ ఫుడ్ బిజినెస్ గట్టి సవాల్ ఇవ్వగలదు.