రాసలీలల ఆరోపణలు.. డబ్ల్యూడబ్ల్యూఈ చైర్మన్ పదవి నుంచి తప్పుకున్న విన్స్ మెక్ మ్యాన్...

డబ్ల్యూడబ్ల్యూఈ చైర్మన్, సీఈఓ పదవులనుంచి విన్స్ మెక్ మ్యాన్ తప్పుకున్నారు. ఆయన మీద రాసలీలల ఆరోపణలు రావడంతో దర్యాప్తుకు సహకరించడానికి పదవులనుంచి వైదొలుగుతున్నట్లు ఆయన ప్రకటించారు. 

ప్రపంచంలోనే అత్యధికంగా టీవీ వీక్షకులు ఉన్న రియాలిటీ ఎంటర్టైన్మెంట్ షో WWE. ఈ షోలో ఊహించని పరిణామం ఒకటి చోటుచేసుకుంది. డబ్ల్యూడబ్ల్యూఈ చైర్మన్, సీఈఓ Vince McMahon(76) తన పదవుల నుంచి వైదొలిగారు. sex affair ఆరోపణల నేపథ్యంలో ఆయన ఈ నిర్ణయం తీసుకోవడం గమనార్హం. మాజీ ఉద్యోగితో ఎఫైర్ నడిపిన విన్స్.. ఆ విషయం బయటికి పోకుండా ఉండేందుకు సదరు ఉద్యోగినితో 3 మిలియన్ డాలర్ల( దాదాపు రూ23.4 కోట్లు) మేరకు ఒప్పందం కుదుర్చుకున్నట్లు ఈ మధ్య ఆరోపణలు వచ్చాయి. 

ఈ తరుణంలో కంపెనీ బోర్డు ఆయనపై విచారణకు ఆదేశించింది. ఈ దరిమిలా తన సీఈవో, చైర్మన్ పదవులకు స్వచ్ఛందంగా వైదొలుగుతున్నట్లు విన్స్ మెక్ మ్యాన్ ప్రకటించారు. మాజీ ఉద్యోగినితో ఎఫైర్ గురించి బయటకు చెప్పకుండా ఉండేందుకు ఆమెకు విన్స్ మెక్ మ్యాన్  డబ్బులు ఇచ్చాడు అని, ఈ మేరకు ఒప్పందం కూడా జరిగిందంటూ వాల్ స్ట్రీట్ జర్నల్ సంచలన కథనం ప్రచురించింది.  అయితే ఈ వ్యవహారంపై డబ్ల్యూడబ్ల్యూఈ బోర్డు దర్యాప్తు ఏప్రిల్లోనే మొదలైందని, దర్యాప్తులో ఎన్నో సంచలన విషయాలు వెలుగుచూశాయి అని ఆ కథనం సారాంశం. 

విన్స్ మెక్ మ్యాన్ తో  పాటు  డబ్ల్యూడబ్ల్యూఈ టాలెంట్ రిలేషన్స్ హెడ్ గా ఉన్న జాన్ లారినైటీస్ మీద కూడా ఆరోపణలు వెలుగులోకి వచ్చాయి. ఈ ఇద్దరి మీద ప్రత్యేక కమిటీ దర్యాప్తు కొనసాగిస్తోందని డబ్ల్యూడబ్ల్యూఈ ఒక ప్రకటనలో తెలిపింది. అప్పటివరకు చైర్మన్, సీఈవో బాధ్యతలకు దూరంగా ఉన్నప్పటికీ… క్రియేటివ్ కంటెంట్ (డబ్ల్యూడబ్ల్యూఈ స్క్రిప్ట్)లో మాత్రం విన్స్ మెక్మాన్ జోక్యం ఉంటుందని డబ్ల్యూ డబ్ల్యూఈ బోర్డ్ స్పష్టం చేసింది. విన్స్ మెక్ మ్యాన్ కూతురు స్టెఫనీ మెక్ మ్యాన్ కు తాత్కాలిక సీఈవో బాధ్యతలు అప్పజెప్పింది దర్యాప్తు కమిటీ.

76 ఏళ్ల వయసున్న విన్నెంట్ కెనెడీ మెక్ మ్యాన్. తండ్రి అడుగుజాడల్లోనే రెజ్లింగ్ ఫీల్డ్ లోనే అడుగుపెట్టాడు. డబ్ల్యూడబ్ల్యూఎఫ్ (ఇప్పుడు డబ్ల్యూడబ్ల్యూఈ  అయ్యింది)లో రింగ్ అనౌన్సర్గా ప్రస్థానం మొదలుపెట్టి కామెంటేటర్ గా పనిచేశాడు. ఆపై భార్య లిండాతో కలిసి సొంత కంపెనీ పెట్టి అటుపై డబ్ల్యూడబ్ల్యూఎఫ్, డబ్ల్యూడబ్ల్యూఈ నెట్వర్క్లతో ఎంటర్టైన్మెంట్ రంగంలో రారాజు గా ఎదిగాడు. విన్స్ మెక్ మ్యాన్ భార్య లిండా,  గతంలో ట్రంపు అధ్యక్షుడిగా ఉన్నప్పుడు కీలక బాధ్యతలు నిర్వహించారు. ఇక మెక్‌మ్యాన్‌ కొడుకు షేన్‌ మెక్‌మ్యాన్‌, కూతురు స్టెఫనీ మెక్‌మ్యాన్‌, అల్లుడు ట్రిపుల్‌ హెచ్‌(పాల్‌ మైకేల్‌ లెవెస్క్యూ) లు కూడా డబ్ల్యూడబ్ల్యూఈలో రెజ్లర్లుగానే కాకుండా కంపెనీ బోర్డు వ్యవహారాల్లో కీలక పాత్రను పోషిస్తున్నారు. ఇదిలాఉంటే డబ్ల్యు డబ్ల్యుఈలో విన్స్ మెక్ మ్యాన్ పై ఈ తరహా ఆరోపణలు గతంలోనూ వచ్చినా... ఇప్పుడు వృత్తిపరమైన నియమావళికి సంబంధించినవి కావడంతో విన్స్ మెక్ మ్యాన్ తప్పనిసరిగా వైదొలగాల్సి వచ్చింది.