సాహిత్యంలో మత్తు పదార్థాల గుబాళింపు
By telugu team | First Published Oct 21, 2021, 3:20 PM ISTరెండు తెలుగు రాష్ట్రాల్లో డ్రగ్స్ నేపధ్యంలో రాజకీయాలు వేడెక్కుతున్న సందర్భంగా ప్రపంచ సాహిత్యంపై డ్రగ్స్ ప్రభావం ఏవిధంగా ఉన్నదో విశాఖపట్నం నుండి మూర్తి కెవివిఎస్ అందిస్తున్నారు.
ఇటీవల ఒక ప్రముఖ బాలీవుడ్ హీరో బలవన్మరణం చెందడం, ఆతర్వాత డ్రగ్ వాడకం గురించి పెద్ద చర్చ లేవడం జరిగింది. ఎప్పుడూ డ్రగ్ వాడకం దారుల గురించి పేపర్లలో ఇంకా పుస్తకాల్లో చదవడం తప్ప లోతుగా వెళ్ళింది లేదు. ఇంత వినాశహేతువైన డ్రగ్స్ కి ఎందుకని మానవ మేధస్సు బానిస అవుతుంది. వాళ్ళేమీ చదువూ సంధ్యా లేనివాళ్ళు కాదు, తెలివితేటలు లేనివాళ్ళు కాదు. మరి ఏమిటని దాని శక్తి అని ఆలోచన మెదిలింది.
ఇంగ్లీష్ నవలల్లో వీటి వర్ణనలు చాలా చోట్ల తారస పడతాయి. ఆ మాటకి వస్తే చాలా మంది ప్రఖ్యాత అమెరికన్, యూరోపియన్ రచయితలు ఈ డ్రగ్స్ ప్రపంచంలో మునిగితేలినవారే. అల్డస్ హక్స్లీ, జాన్ కీట్స్, చార్లెస్ బోదిలేర్, జార్జ్ బెర్నార్డ్ షా, మపాసా, జాక్ లండన్ నుంచి అయాన్ రాండ్ దాకా చాలామంది..ఈ లిస్ట్ చాలా పెద్దది. పుస్తకాల్లో వీటిని Pot, Weed, Grass, Herb అంటూ అబ్బో చాలా పేర్లు ఈ మత్తు పదార్థాలకి..!
Latest Videos
undefined
వీటిని తీసుకున్నప్పుడు మనిషిలో ఏం జరుగుతుంది అంటే ఇంద్రియాల్ని దాటిన ఒక స్థితికి తీసుకువెళుతుంది. అక్కడ సృజనాత్మకత స్థాయి అత్యున్నత దశకి చేరి ఏ ఆటంకాలూ లేకుండా ప్రవహిస్తుందని జేంస్ జాయిస్ అంటాడు. ప్రతిదాన్ని గమనించే విధానం మామూలు మనిషి కంటే లోతుగా నిశితంగా ఉంటుంది. అందుకనే దీనికి చేరువ అయ్యారేమో అనిపిస్తుంది. పాఠకుడికి సాధ్యమైనంత గొప్ప అనుభూతిని ఇవ్వడంలో భాగంగానే తాను త్రాగుతానని ఎర్నెస్ట్ హెమింగ్వే బాహాటంగానే వెల్లడించాడు.
నేను మొదటసారిగా ఇంగ్లీష్ రచయితల వర్ణనా శక్తికి స్టన్ అయింది ఎప్పుడంటే జాక్ లండన్ రాసిన ద వైట్ ఫేంగ్ అనే నవలిక చదివినపుడు..! ఒక కుక్క జీవితం మీద రాసినది అది. నిజంగా ఒక కుక్క పుట్టినప్పటి నుంచి తాను చనిపోయేవరకు చేసిన జీవనయానం అది. ఎక్కడా కృత్రిమత్వం లేదు. కావాలని రాసిన వాక్యాలు లేవు. ఇంత ట్రాన్స్ లోకి, కుక్క జీవితంలోకి ఎలా వెళ్ళి రాశాడబ్బా అని చాలానాళ్ళు ఆలోచించాను. తర్వాత దానిబాటలోనే మన తెలుగు తో సహా అనేక భాషల్లో కుక్క మీద, కోడి మీద రకరకాల వాటి మీద రాశారులే గాని ఎందుకనో అన్నీ నన్ను నిరాశపరిచాయి. ఏదో ఆత్మ లోపించినట్టు తోచింది. ఆ తర్వాత జాక్ లండన్ యొక్క జీవితం చదివిన తదుపరి బహుశా డ్రగ్ అనేది ఇలా కూడా పనిచేస్తుందన్నమాట అనిపించింది. ఇక జేంస్ జాయిస్, ఎఫ్.స్కాట్ ఫిడ్జ్రాల్డ్, ఓ.హెన్రీ లాంటి గొప్ప రచయితలు కూడా విపరీతమైన ఆల్కాహాల్ వల్లనే మరణించారు. ఒకరకంగా కొవ్వొత్తుల్లా కరుగుతూ పాఠక ప్రపంచానికి అమూల్యమైన నిధులు అందించి పోయారు.
కృత్రిమంగా తయారు చేసే డ్రగ్స్ ఉన్నాయిలే గాని గంజాయిదే అగ్ర తాంబూలం ఏ రకంగా చూసినా. దాని ఆకులు, విత్తనాలు, పువ్వులు వీటి అన్నిటి నుంచి రకరకాల డ్రగ్స్ తయారు చేస్తారు. చరస్ అనేది జీవించి ఉన్న మొక్క నుంచి తయారుచేస్తే, హషిష్ అనేదాన్ని కోసేసిన మొక్కల భాగం నుంచి తయారు చేస్తారు. భంగ్ అనేదీ దానినుంచి తయారుచేసిందే. మన దక్షిణ భారతదేశంలో తక్కువే గాని ఉత్తర భారతదేశంలో భంగ్ ను విరివిగా, అంతటా అమ్ముతుంటారు. హోలీ, శివరాత్రి పండుగల సమయంలో సహజ ప్రసాదం అది.
లైసెన్స్ ఇవ్వబడిన షాప్ లు రాజస్థాన్, ఉత్తర్ ప్రదేశ్ వంటి రాష్ట్రాల్లో ఉన్నాయి. కొన్ని వందల ఏళ్ళ నుండి సాంప్రదాయపరమైన అంశాలతో ముడిపడి ఉన్నందున దీనికి వ్యతిరేకత ఉన్నట్లు లేదు. పెద్దగా విశాలమైన కాంతివంతమైన కళ్ళు, శరీర వర్ణం వీటి అన్నిటి మీద దీని ప్రభావం ఉన్నదా అనిపిస్తుంది అక్కడ చాలా మందిని చూసినపుడు.
డ్రగ్స్ యొక్క ప్రభావాన్ని వర్ణించే కొన్ని ఘట్టాల్ని ఒక ఆంగ్ల నవలలో ఇటీవలనే చదివాను. దాంట్లో ఒక పాత్ర కొత్తగా డ్రగ్ తీసుకుని Pink Floyd పాటల్ని వింటూ ఉంటుంది. కాసేపయిన తర్వాత, సరే నేను వెళతాను పావు గంటే కదా అయింది అంటుంది. అప్పుడు మరో పాత్ర "లేదు మధ్యానం నుంచి సాయంత్రం దాకా వింటూనే ఉన్నావు. కాకపోతే సమయం అలా తగ్గిపోతుంది అంతే" అంటుంది. అదీ దాని మహిమ. జాజ్ , గిటార్ కళాకారులు వంటి వారు తదేక ధ్యానం తో అలుపు తెలియకుండా వాయించడానికి దీన్ని ఆశ్రయిస్తుంటారు. ఇలాంటివి అన్నీ దానిలో వస్తాయి. ఇంకొన్ని డ్రగ్స్ తీసుకుంటే భ్రాంతి ప్రపంచంలో రకరకాల దృశ్యాలు కనిపించడం ఇలా ... పెద్ద సబ్జెక్ట్ అది.
మోతాదు దాటి అలవాటు పడితే స్వర్గమే నరకమవుతుంది. ఈ సృష్టిలో ప్రతి మొక్క ఏదో ఒక దానికి ఉపయోగపడినట్లే గంజాయి మొక్క కూడా అనేక ఔషధ గుణాలు కలిగి ఉంది. ఆయుర్వేదంలోనూ, ఇప్పుడు ఆధునిక వైద్యంలోనూ దీనిని ఉపయోగిస్తూనే ఉన్నారు. మిగతా విషయాలు మరొక సారి మాట్లాడుకుందాం.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి