పాల పొడితో టీ, కాఫీలు తయారుచేసి తాగుతుంటారు. వీటికొక్కదానికే కాదు పాల పొడిని ఎన్నో విధాలుగా ఉపయోగించొచ్చు. అవును పాలపొడితో మనం ఏమేమి చేయొచ్చో ఇప్పుడు తెలుసుకుందాం పదండి.
తాజా పాలు అందరికీ అందుబాటులో ఉండవు. అందుకే చాలా మంది ప్యాకెట్ పాలను ఉపయోగిస్తుంటారు. కానీ ఈ ప్యాకెట్ పాలు కూడా ఇంట్లో ఎక్కువ రోజులు నిల్వ ఉండవు. అందుకే చాలా మంది మిల్క్ పౌడర్ ను బాగా ఉపయోగిస్తుంటారు. పాల పౌడర్ అనేది పాశ్చరైజ్డ్ స్కిమ్ పాల నుంచి నీళ్లను మొత్తం తీసేసిన తర్వాత తయారైన పొడి పాల పొడి. ఇది పాల లాగే మన శరీరానికి మంచి పోషణను అందిస్తుంది. ఈ పాల పొడిలో ప్రోటీన్, పొటాషియం, రిబోఫ్లేవిన్, విటమిన్ ఎ, విటమిన్ డి, విటమిన్ ఇ, విటమిన్ కె, విటమిన్ బి 12 పుష్కలంగా ఉంటాయి.
సాధారణంగా పాల పొడి షెల్ఫ్ లైఫ్ చాలా ఎక్కువగా ఉంటుంది. వీటిని తాజా పాలకు ప్రత్యామ్నాయంగా ఉపయోగిస్తుంటారు. అయితే పాలపొడిని ఒక్క వంటలు చేయడానికే కాదు కొన్ని ఇంటి పనులు చేయడానికి కూడా ఉపయోగించొచ్చు. అవును పాల పొడిని దేనిదేనికి ఉపయోగించొచ్చో ఇప్పుడు తెలుసుకుందాం..
వెండి వస్తువులను శుభ్రం చేయడానికి..
వెండి వస్తువులు కాలక్రమేణా నల్లగా అవుతుంటాయి. ఇది కామన్. వీటిని శుభ్రం చేయడానికి ఏవేవో చేస్తుంటారు. కానీ పూర్తిగా తెల్లగా కావు. ఇలాంటప్పుడు మీరు మిల్క్ పౌడర్ ను ఉపయోగించొచ్చు. అవును పాల పొడిలో ఉండే లాక్టిక్ యాసిడ్ వెండిని శుభ్రం చేయడానికి, పాలిష్ చేయడానికి సహాయపడుతుంది. వెండి వస్తువులను శుభ్రం చేయడానికి మీరు మిల్క్ పౌడర్ ను నీటిలో కలిపి పేస్ట్ చేయండి. ఇప్పుడు దీన్ని వెండి పాత్రలకు పెట్టి కాసేపు అలాగే వదిలేయండి. ఆ తర్వాత ఈ పాత్రలను శుభ్రంగా కడగండి.
సిరా మరకలను తొలగించడానికి..
దుస్తులపై ఇంకు చుక్కలు పడటం కూడా చాలా కామన్. కానీ ఈ సిరా చుక్కలు దుస్తులపై అంత సులువుగా పోవు. కానీ మీరు సిరా చుక్కలను మిల్క్ పౌడర్ ను ఉపయోగించి చాలా సులువుగా పోగొట్టొచ్చు. ఇందుకోసం పాలపొడిని కొద్దిగా నీటిలో కలిపి పేస్ట్ లా తయారుచేయండి. దీన్ని సిరా చుక్కలకు అప్లై చేసి కాసేపు అలాగే వదిలేయండి. ఆ తర్వాత బాగా ఉతికి శుభ్రం చేయండి.
ఎరువుగా వాడొచ్చు
గార్డెనింగ్ ఇష్టమైన వారు పాల పొడిని ఎరువుగా కూడా ఉపయోగించొచ్చు. అవును పాలపొడిలో ప్రోటీన్ చాలా ఉంటుంది. అందుకే ఇది మొక్కలకు మంచి ఎరువులా పనిచేస్తుంది. మొక్కలకు అదనపు పోషకాలను అందించడానికి పాలపొడిని మట్టిలో కలపండి.
చీడపీడలను తొలగించడానికి..
మొక్కల చుట్టూ పాలపొడిని పిచికారీ చేయడం వల్ల ఎఫిడ్స్ వంటి కీటకాలు మొక్కలకు పట్టకుండా ఉంటాయి. పాలపొడి వాసన, దాని ఆకృతి కారణంగా చీడపీడలు రావు. అందుకే తోటపని చేసేవారు పాల పొడిని ఉపయోగించడం వల్ల ప్రయోజనకరంగా ఉంటుంది.
పెయింటింగ్ చేయడానికి..
ఇది కొంచెం మీకు వింతగా అనిపించొచ్చు.. కానీ పాల పొడిని పెయింటింగ్ వేయడానికి కూడా ఉపయోగించొచ్చు. పాల పొడిలో వాటర్, కలర్స్, సున్నం లేదా బోరాక్స్ వంటి బైండర్ ను కలిపి పర్యావరణ అనుకూల పెయింట్ ను వేయొచ్చు. ఈ పెయింట్ ను క్రాఫ్ట్ ప్రాజెక్టులకు ఉపయోగించొచ్చు. ఈ విధంగా పిల్లల ఆర్ట్, క్రాఫ్ట్ ప్రాజెక్టులను పూర్తి చేయడానికి మిల్క్ పౌడర్ కూడా వాడొచ్చు.