మీరు అలెర్ట్గా లేకపోతే డిజిటల్ అరెస్ట్ అవుతారు. ఈ మోసం నుంచి ఇలా తప్పించుకోండి
డిజిటల్ అరెస్ట్ పేరుతో ఈ మధ్య కొత్త రకం మోసాలు జరుగుతున్నాయి. వీటి బారిన పడి చాలా మంది కోట్ల రూపాయలు పోగొట్టుకున్నారు. మోసగాళ్ళు ప్రభుత్వ అధికారుల్లా నటించి మీ డబ్బు కొల్లగొడతారు. అప్రమత్తంగా లేకపోతే మీరు కూడా డిజిటల్ అరెస్ట్ అయ్యే ప్రమాదం ఉంటుంది. డిజిటల్ అరెస్ట్ మోసం నుంచి తప్పించుకోవడానికి సూచనలు, సలహాలు ఇక్కడ తెలుసుకుందాం.
మోసగాళ్ళు ప్రభుత్వ అధికారుల్లా నటించి ప్రజలను మోసం చేస్తున్నారు. ఇది తెలియక ఫోన్ చేసింది అధికారులే అనుకొని జనం వారు అడిగిన సమాచారం మొత్తం ఇచ్చేస్తున్నారు. దీంతో క్షణాల్లో మన బ్యాంకు అకౌంట్లలో ఉన్న డబ్బులు దొంగిలించేస్తున్నారు. ఇలాంటి మోసాలు పెరిగిపోవడంతో ప్రధాని మోడీ కూడా ప్రజలను హెచ్చరించారు. ఇలాంటి భయపెట్టే కాల్స్ వస్తే వెంటనే సైబర్ క్రైమ్ హెల్ప్లైన్కు ఫిర్యాదు చేయమని చెప్పారు. CERT-In కూడా ఈ మోసం గురించి వివరించింది.
డిజిటల్ అరెస్ట్ మోసం అంటే ఏమిటి?
డిజిటల్ అరెస్ట్ మోసం ఒక రకమైన ఆన్లైన్ మోసం. మోసగాళ్ళు కష్టపడి సంపాదించిన డబ్బును దోచుకుంటారు. బాధితులను భయపెట్టి, చట్టవిరుద్ధ కార్యకలాపాలకు పాల్పడ్డారని ఫేక్ ఆరోపణలు చేస్తారు. మీకు శిక్ష పడకుండా ఉండాలంటే వెంటనే డబ్బు పంపమని బెదిరిస్తారు. ఉన్నతాధికారులు డబ్బులు అడుగుతున్నారని గంటలో అడిగినంత డబ్బు ఇవ్వకపోతే నేరుగా వచ్చి అరెస్టు చేస్తమని భయపెడతారు.