రూల్స్ పాటిస్తే.. అత్యవసర వేళ్లలో క్రెడిట్ కార్డ్ మోస్ట్ యూజ్ఫుల్
క్రెడిట్ కార్డు తీసుకోవడం వల్ల ప్రయోజనాలు ఉన్నాయి. వడ్డీలేని రుణ పరపతి కల్పించే, అత్యవసర సమయాల్లో ఆదుకునే సాధనమే క్రెడిట్ కార్డు. ఆన్లైన్ షాపింగ్లు, బిల్లుల చెల్లింపు జరిపిన వారికి పలు ఇతర ప్రయోజనాలు లభిస్తాయి. ఈ ప్రయోజనాలన్నీ సకాలంలో ‘క్రెడిట్ కార్డు’ చెల్లింపులు చేసే వారికి అనుకూలంగా ఉంటాయి. గడువులోపు చెల్లించకపోతే మాత్రం భారీ వడ్డీ చెల్లించాల్సి ఉంటుంది. పలు రకాల క్రెడిట్ కార్డుల్లో వినియోగదారులు తమకు అనువైనదే ఎంచుకోవాలి.. తీసుకున్న తర్వాత సకాలంలో బకాయిలు చెల్లిస్తూ ముందుకు సాగాలి. ఒకవేళ క్రెడిట్ స్కోర్ తక్కువగా ఉంటే ‘క్రెడిట్ కార్డు’ దరఖాస్తు తిరస్కారానికి గురవుతుంది.
క్రెడిట్ కార్డులో అధిక చార్జీలు ఉంటాయని, రుణ భారంలో చిక్కుకుంటామన్న అభిప్రాయాలతో చాలా మంది వీటిని తీసుకోవడానికి అంతగా ఇష్ట పడరు. కానీ, అదంతా నాణానికి ఒకవైపు మాత్రమే సుమా. క్రెడిట్ కార్డులతో ప్రయోజనాలూ ఉన్నాయి.
అత్యవసరాలు, ఆన్లైన్ చెల్లింపుల్లో వినియోగంతో క్రెడిట్ స్కోరును పెంచుకునేందుకు క్రెడిట్ కార్డు వీలు కల్పిస్తుంది. మంచి క్రెడిట్ స్కోర్ అనేది గృహ, వ్యక్తిగత రుణాలకు చాలా అనుకూలమన్న సంగతి తెలిసిందే.
వాస్తవానికి ప్రతీ సాధనానికి సానుకూల, ప్రతికూలతలు ఉన్నట్టే క్రెడిట్కార్డు విషయంలోనూ ప్రయోజనాలు, మైనస్ పాయింట్లూ ఉన్నాయి. కాకుంటే అందరికీ ఒకేలా వర్తించవు. వ్యక్తుల ప్రొఫైల్కు అనుగుణంగా మారిపోతుంది.
క్రెడిట్కార్డు విషయంలో అనుకూలతలను ఉపయోగించుకుని, అననుకూలతలను అధిగమించడం మంచి నిర్ణయం అవుతుంది. ఈ నేపథ్యంలో క్రెడిట్ కార్డుల గురించి సమగ్ర వివరాలను అందించే కథనమే ఇది.
వడ్డీ లేకుండా రుణం సకాలంలో చెల్లింపులు చేసే వారికి అనుకూల మార్గం ‘క్రెడిట్ కార్డు’. అత్యవసర సమయాల్లో ఆదుకునే సాధనంగా ఉపకరిస్తుంది. ఆన్లైన్ షాపింగ్లు, బిల్లుల చెల్లింపులపై తగ్గింపులు మరెన్నో ఇతర ప్రయోజనాలు ఉన్నాయి.
కానీ గడువులోపు ‘క్రెడిట్ కార్డు’ ద్వారా జరిపిన లావాదేవీల మొత్తం సదరు బ్యాంకుకు చెల్లించకపోతే చెల్లించకపోతే మాత్రం భారీ వడ్డీ చెల్లించాల్సిన పరిస్థితి ఎదురవుతుంది. క్రెడిట్ కార్డుల్లో ఎన్నో రకాలు అందుబాటులో ఉన్నాయి. వాటిల్లో ఎవరికి వారు తమకు అనువైనదే ఎంచుకోవాలి.
సకాలంలో బకాయిలు చెల్లించాలి. క్రెడిట్ స్కోర్ తక్కువ ఉంటే కార్డు ఇవ్వడానికి బ్యాంకులు తిరస్కరించవచ్చు. జీవితంలో కొన్ని సందర్భాల్లో రుణ అవసరం ఎంతో ఏర్పడవచ్చు. ముఖ్యంగా ఉన్నత విద్య కోసం రుణాలు, గృహ రుణాలు, వ్యాపార రుణాల కోసం బ్యాంకులను ఆశ్రయించినప్పుడు మంచి క్రెడిట్ స్కోర్ ఉన్న వారికి రుణాలు సులభంగా వస్తాయి.
ఇతరులతో పోలిస్తే మంచి క్రెడిట్ స్కోరు ఉన్న వారికి బ్యాంకులు వేగంగా ప్రక్రియను పూర్తి చేయడమే కాక, తక్కువ వడ్డీ రేటును సైతం ఆఫర్ చేస్తాయి. కాకపోతే క్రెడిట్ కార్డును వినియోగించే వారు క్రెడిట్ లిమిట్ దాటకుండా జాగ్రత్త పడాలి.
క్రెడిట్కార్డు పరిమితిలో 30–50 శాతం వరకే వినియోగించుకోవడం స్కోర్ను పెంచుకునే సానుకూల చర్య అని నిపుణులు పేర్కొంటున్నారు. దీన్ని రుణమిచ్చే సంస్థలు సానుకూలంగా చూస్తాయి. క్రెడిట్ కార్డులో ఉన్న అత్యంత అనువైన ఫీచర్ వడ్డీ రహిత కాలం. క్రెడిట్ కార్డును సానుకూల ప్రయోజనాల కోసం వినియోగించుకోవాలనుకుంటే ఇది చక్కని వసతే అవుతుంది.
కార్డును బట్టి క్రెడిట్ లిమిట్ వినియోగించుకున్న తేదీ నుంచి 45–50 రోజుల వరకు వడ్డీ రహిత కాలం ఉంటుంది. అంటే గడువు దాటకుండా చెల్లింపులు చేస్తే వడ్డీ పడదు. సకాలంలో చెల్లించే వారికే ఇది అనుకూలం. లేదంటే భారీ వడ్డీతో ప్రతికూలంగా మారుతుంది సుమా.
అత్యవసర సమస్యలు చెప్పి రావు. ముఖ్యంగా వైద్య పరమైన అవసరాల్లో అప్పటికప్పుడు పెద్ద మొత్తం డబ్బుతో అవసరం పడొచ్చు. క్రెడిట్ కార్డును దాదాపు అన్ని ఆస్పత్రులూ అనుమతిస్తున్నాయి. కీలక సందర్భాల్లో ఎదురయ్యే తక్షణ ఖర్చులను క్రెడిట్ కార్డుతో గట్టెక్కడానికి వీలు ఉంటుంది.
ప్రస్తుతం ఈ-కామర్స్ కంపెనీల విస్తరణతో ఆన్లైన్ కొనుగోళ్లు పెరుగుతున్నాయి. వీటిల్లో చెల్లింపులకు క్రెడిట్ కార్డులు ఎంతో అనుకూలం. ఎందుకంటే క్రెడిట్ కార్డుల ద్వారా జీరో వడ్డీతో ఈఎంఐ చెల్లింపులకు ఈ- కామర్స్ సంస్థలు అవకాశం కల్పిస్తున్నాయి.
పైగా ఈఎంఐ కొనుగోళ్లపై ఇన్స్టంట్ డిస్కౌంట్, క్యాష్బ్యాక్ ఆఫర్లు కూడా ఉంటాయి. కాకపోతే క్రెడిట్ కార్డు ఉందని ఆలోచన లేకుండా జోరుగా షాపింగ్ చేస్తే ఆ తర్వాత లబోదిబోమనాల్సి వస్తుందని ఆర్థిక నిపుణులు హెచ్చరిస్తున్నారు.
క్రెడిట్ కార్డులతో ప్రతి నెలా నిర్ణీత తేదీ లోపు బిల్లులు చెల్లింపులు జరిగేలా సెట్ చేసుకోవచ్చు. దీనివల్ల గడువు దాటిన తర్వాత లేట్ ఫీజు పడకుండా సకాలంలో చెల్లింపులు జరిగిపోతాయి. బీమా ప్రీమియం వంటి ముఖ్యమైన సాధనాలు ల్యాప్స్ అవకుండా కూడా చూసుకోవచ్చు.
క్రెడిట్ కార్డులు తీసుకుని వాడకుండా షెల్ఫ్లో పెట్టేస్తే ఎటువంటి ప్రయోజనం నెరవేరదు. ఒకటికి మించి కార్డులు తీసుకుని ఏదో ఒకదాన్ని వాడుతూ, మిగిలిన వాటిని అత్యవసరాల్లో ఉపయోగపడతాయనే భావనతో ఉంచుకుంటే సరిపోదు. వాటినీ మధ్య మధ్యలో వాడితేనే ప్రయోజనం.
క్రెడిట్కార్డు లిమిట్ను కంపెనీలే నిర్ణయిస్తుంటాయి. అయితే, మీకు సౌకర్యం అనుకున్నంత వరకే లిమిట్ను మీరే నిర్ణయించుకోవచ్చు. ఉదాహరణకు క్రెడిట్ కార్డును రూ.లక్ష లిమిట్తో జారీ చేసిన తర్వాత... దాన్ని తరచుగా వినియోగిస్తూ, సకాలంలో బిల్లుల చెల్లింపులు చేసే వారికి కంపెనీలు క్రెడిట్ లిమిట్ను ఏటేటా పెంచుతాయి. ఇలా పెంచడం సౌకర్యంగా లేకపోతే, పెంచొద్దని కోరే అవకాశం ఉంటుంది.
వివిధ ఆర్థిక సంస్థలు, బ్యాంకులు జారీ చేసే క్రెడిట్ కార్డులు అన్నీ ఒకేలా ఉండవు. కార్డులను బట్టి ప్రయోజనాలు మారిపోతుంటాయి. వార్షిక ఫీజులు, రివార్డు పాయింట్లు తదితర అంశాల ఆధారంగా మీకు అనువైన కార్డును ఎంపిక చేసుకోవాలి. గరిష్టంగా ఒకటి నుంచి మూడు కార్డులు మించకుండా జాగ్రత్తపడాలి.
ఆర్థిక ప్రపంచంలో క్రెడిట్ కార్డు అన్నది ఓ కొకైన్ అని స్కాట్ ఆడమ్స్ అభివర్ణన. క్రెడిట్ కార్డుకు బానిస కాకుండా, దాన్ని మీ కోసం పని చేయించుకోవాలని నిపుణులు సూచిస్తుంటారు. కొన్ని కార్డులు ప్రత్యేకంగా రెస్టారెంట్లలో చెల్లింపులపై డిస్కౌంట్లు, మరికొన్ని కార్డులు ప్రత్యేకంగా వాహనాలకు పెట్రోల్ లేదా డీజిల్ నింపుకున్న సమయాల్లో రివార్డు పాయింట్లను క్యాష్ బ్యాక్గా పొందే సదుపాయం కల్పిస్తాయి. ఈ అవసరాల కోసమే అయితే వీటిని తీసుకోవాలి.
కొన్ని కార్డులపై విమానాశ్రయ లాంజీల్లో ఉచిత ప్రవేశ సదుపాయం ఉంటుంది. విదేశాలకు వెళితే క్రెడిట్ కార్డుకు బదులు ముందుగా కరెన్సీ లోడ్ చేసిన ట్రావెల్కార్డును తీసుకెళ్లడంతో ఖర్చులు ఆదా చేసుకోవచ్చు. క్రెడిట్కార్డు ద్వారా విదేశాల్లో చెల్లింపులు చేస్తే కరెన్సీ మార్పిడి రేటు అధికంగా పడుతుంది. కానీ ట్రావెల్ కార్డుతోపాటు ఒక క్రెడిట్ కార్డును కూడా వెంట తీసుకెళ్లడం మంచిది.
బిల్లులను గడువు దాటకుండా తీర్చేసే వీలుంటేనే కార్డు తీసుకోవాలి. లేదంటే క్రెడిట్ స్కోరు తీవ్రంగా దెబ్బతింటుంది. అదే జరిగితే తర్వాత రుణం లభించడం కష్టం అవుతుంది. గడువు దాటితే మూడు రూపాయలు, అంతకంటే ఎక్కువ వడ్డీతో చెల్లించాల్సి రావడం భారంగా మారుతుంది. ఆన్లైన్లో డిస్కౌంట్ ప్రయోజనం పొందేందుకు క్రెడిట్ కార్డుతో చెల్లింపులు చేసిన వారు... గడువు వరకు ఆగకుండా వీలైనంత ముందే ఆ మొత్తాన్ని చెల్లించాలి.
క్రెడిట్ కార్డు ఇచ్చే ప్రతీ సంస్థ కూడా కార్డుదారుడు బకాయిలు తిరిగి చెల్లించగలరా? అని చూస్తుంది. అధిక రిస్క్తోపాటు తిరిగి చెల్లించే సామర్థ్యం తక్కువగా ఉంటే కార్డు ఇవ్వడానికి నిరాకరిస్తాయి. వ్యాపార రంగంలోని వారికి, స్వయం ఉపాధిలో ఉన్న వారి నుంచి డిఫాల్ట్ రిస్క్ ఎక్కువగా ఉంటుందని నిపుణులు తెలిపారు. తిరిగి చెల్లించే సామర్థ్యాన్ని తెలుసుకోవాలంటే అందుకు ఉన్న ఏకైక మార్గం క్రెడిట్ రిపోర్ట్ను చూడడమే.
ప్రతీ వ్యక్తి తన రుణచరిత్రను క్రెడిట్ స్కోర్ రూపంలో తెలుసుకోవచ్చు. రుణాలకు తిరిగి చెల్లింపులు ఏ విధంగా ఉన్నాయి, రుణాల్లో సమతుల్యత, ఇతర అంశాలను పరిగణనలోకి తీసుకుని క్రెడిట్ బ్యూరో సంస్థలు క్రెడిట్ స్కోరును ఇస్తాయని బ్యాంక్ బజార్ డాట్ కామ్ ముఖ్య అభివృద్ధి అధికారి నవీన్ చందానీ తెలిపారు.
‘తక్కువ క్రెడిట్ స్కోరు గతంలో రుణాలకు సకాలంలో చెల్లింపులు చేయలేదని సూచిస్తుంది. రుణ ఖాతాలను సరిగ్గా మూసివేయకపోవడం వల్ల కూడా ఇలా జరిగి ఉంటుంది. రుణానికి అవకాశం ఉంది కదా అని అధిక మొత్తంలో తీసుకోవడం కూడా స్కోర్పై ప్రభావం చూపిస్తుంది. దీంతో క్రెడిట్ కార్డు దరఖాస్తు తిరస్కరణకు గురవుతుంది’’ అని బ్యాంక్ బజార్ డాట్ కామ్ ముఖ్య అభివృద్ధి అధికారి నవీన్ చందానీ చెప్పారు.
క్రెడిట్ స్కోరు మెరుగుపడినా గత రుణాలు డిఫాల్ట్ అయిన సంగతి క్రెడిట్ రిపోర్ట్లో పేర్కొనడంతోనూ క్రెడిట్ కార్డు పొందలేని పరిస్థితి ఎదురుకావచ్చు. ఒకటి మించి క్రెడిట్ కార్డులకు దరఖాస్తు చేసుకోరాదు. అలా చేస్తే అన్నీ కూడా తిరస్కరణకు గురి కావచ్చు. ఇది క్రెడిట్ కోసం అర్రులు చాచినట్టు అవుతుంది. ఇలా ఒకటికి మించిన దరఖాస్తులు కూడా క్రెడిట్ స్కోరును తగ్గిస్తాయి’ అని బ్యాంక్ బజార్ డాట్ కామ్ ముఖ్య అభివృద్ధి అధికారి నవీన్ చందానీ వివరించారు.
తిరిగి చెల్లించే సామర్థ్యం ఉన్నవారే క్రెడిట్ కార్డు కోసం ముందుకు వెళ్లాలని నిపుణులు సూచించారు. ముందుగా క్రెడిట్ స్కోరును పరిశీలించుకుని తక్కువగా ఉంటే, ఏవైనా తప్పులు ఉన్నాయోమో చూసుకుని సరి చేయించుకోవాలన్నారు. పాత బకాయిలు ఉంటే వాటిని తీర్చివేసిన తర్వాత క్రెడిట్ కార్డుకు దరఖాస్తు చేసుకోవాలని సూచించారు.