"ఆంధ్ర ప్రదేశ్, తెలంగాణా నీ బాబు సొత్తా? నీకా దమ్ముందా?-వర్మ
- ఎన్టీఆర్ పై చిత్రం టైటిల్ "లక్ష్మీస్ ఎన్టీఆర్" అని ప్రకటించిన వర్మ
- ఎన్టీఆర్ కు జరిగిన వెన్నుపోట్లు, కడుపు పోట్లు,చావుకు ప్రధాన కారణం ఏంటో చూపిస్తానంటున్న వర్మ
- దీనిపై ఓ ఛానెల్ చర్చలో వర్మను తెలుగు రాష్ట్రాల్లో తిరగబోనివ్వమన్న ఎమ్మెల్సీ రాజేంద్రప్రసాద్
- రాజేంద్ర ప్రసాద్ వ్యాఖ్యలపై తీవ్రంగా స్పందించిన రామ్ గోపాల్ వర్మ
సంచలన దర్శకుడు రామ్ గోపాల్ వర్మ ఎన్టీఆర్ జీవితం ఆధారంగా తెరకెక్కించాలనుకుంటున్న మూవీకి లక్ష్మీస్ ఎన్టీఆర్ అనే టైటిల్ ఎనౌన్స్ చేసిన సంగతి తెలిసిందే. అయితే వర్మ తీస్తానన్న “లక్ష్మీస్ ఎన్టీఆర్”సినిమాను.. చంద్రబాబుకు వ్యతిరేకంగా తీస్తే తెలుగు రాష్ట్రాల్లో తిరనివ్వం అని వ్యాఖ్యానించిన ఎమ్మెల్సీ బాబూ రాజేంద్రప్రసాద్‌కు రాంగోపాల్ వర్మ ఘాటు సమాధానం ఇచ్చాడు.
‘టీవి9లో వచ్చి నా సినిమా గురించి మాట్లాడిన ఆ బాబురాజేంద్రప్రసాద్ ఎవడో నాకు తెలియదు. కానీ నన్ను రెండు తెలుగు రాష్ట్రాల్లో తిరగనివ్వను అన్న.. వాడి వార్నింగ్‌కి నేనిచ్చే సమాధానం..’ అంటూ ఫేస్‌బుక్ వేదికగా వర్మ తనదైన శైలిలో సమాధానమిచ్చాడు. ‘ఆంధ్ర ప్రదేశ్, తెలంగాణా నీ అబ్బ సొత్తా? నీకు దమ్ముంటే లక్ష్మీ పార్వతి విషయంలో ఎన్.టి.ఆర్.కి మైండ్ దొబ్బింది అని ఓపెన్‌గా చెప్పు. కానీ, ఎన్.టి.ఆర్. పర్సనల్ ఎమోషన్స్‌ని ఇన్సల్ట్ చెయ్యకు’ అంటూ రాజేంద్రప్రసాద్‌పై మండిపడ్డాడు.
ఇక ‘నా ఎన్.టి.ఆర్..’ అంటూ మొదలుపెట్టి ఫేస్‌బుక్‌లో అసలు ఈ సినిమా ఎందుకు తీయాలనుకుంటున్నాడో వర్మ చాలా స్పష్టంగా తన మనోభావాలు చెప్పాడు.
“ఎన్టీఆర్ గారి గురించి బయట వాళ్లు, వాళ్ల ఇంట్లో వాళ్లు, పార్టీ లోపలున్న వాళ్లు.. పార్టీ నుంచి బయటకు వెళ్లిపోయిన వాళ్లు, ఎవళ్ళకి వాళ్లు ఆయన మీద వాళ్లకి ఇష్టమొచ్చిన సినిమాలు తీసుకోవచ్చు. అంత గొప్ప మహానుభావుడి అంతరంగం ఏంటో తెలుగు ప్రజలకి వాళ్ల వాళ్ల దృష్టిలో చూపించవచ్చు. అలాగే లక్ష్మీపార్వతి ఎన్టీఆర్ లాంటి అతి గొప్ప మహానుభావుడినే ప్రభావితం చేసిందంటే ఆమెలో ఏదో ప్రత్యేకత లేకపోతే ఎన్.టి.ఆర్. ఎందుకు ఆకర్షితులౌతారు అనే ముఖ్యమైన ప్రశ్నకి నేను నా సినిమాలో సమాధానం చూపించదలచుకున్నా.
చరిత్ర అనేది ఎవరో చింపేస్తే చిరిగిపోవడానికో.. కాల్చేస్తే కాలిపోవడానికి, దాచేస్తే తెలియకుండా దాగిపోవడానికి వెర్రిబాగులది కాదు. తెలుగు చరిత్రని గర్వంగా తల ఎత్తుకు తిరిగేటట్టు చేసిన ఘనత ఎన్‌టిఆర్‌ది. ఒక గొప్ప మహానుభావుడు జాతిని ప్రభావితం చేస్తాడు. జాతి ఎపుడూ మహానుభావులను ప్రభావితం చేయదు. అలాగే తెలుగుజాతిని ప్రభావితం చేసిన ఎన్టీఆర్‌ది ఒక చరిత్ర. అలాంటి మహానుభావుడి చరిత్రలో ఆయనే స్వయంగా ప్రపంచానికి చెప్పిన ఒక అతి ముఖ్య ఘట్టాన్ని నేను తెర మీద చుపించాలనుకుంటున్నా.
ఒక ప్రతిభావంతమైన సూపర్ స్టార్, జాతీయ స్థాయిలో రాజకీయాలను ప్రభావితం చేసి.. తర్వాత ప్రభుత్వాలకు ఒక రోల్ మోడల్‌గా ఎదిగిన ఎన్.టి.ఆర్. మనోభావాలను బుద్ధి వున్న ప్రతి ఒక్కడూ గౌరవించడం నేర్చుకోవాలి. ఇలాంటి సున్నితమైన వ్యక్తిగత భావాలకి వ్యతిరేకంగా మాట్లాడుతున్న వాళ్ల మాటలు విని ఆయన ఆత్మ క్షోభించడంతో పాటు విపరీతమైన కోపాన్ని కూడా చూపిస్తుందనడంలో నాకు ఎలాంటి సందేహం లేదు.
ఎన్టీఆర్ను ఫాలో అవ్వడం అంటే ఆయన నిర్ణయాల్ని ఫాలో అవ్వడం. ఆ నిర్ణయం ఏదైనా "బాస్ ఈజ్ ఆల్వేస్ రైట్" అనే నిజాయతీ ఉన్నప్పుడే వాళ్లే నిజమైన ఫాలోవర్లు అవుతారు. అలా ఆయా నిర్ణయాల్ని ఫాలో అయినా వాళ్లే నిజమైన ఫాలోవర్లు. లేకపోతే వాళ్లు దొంగ ఫాలోవర్లు.
ఎన్టీఆర్ నిర్ణయాలను అవమానిస్తే ఎన్టీఆర్ను అవమానించినట్టే. ఆయన మీదున్న గౌరవం ఈ భూమి మీద ఉన్నంతవరకే కాదు, ఆ తర్వాత కూడా నిలబెట్టాలి. అప్పుడే ఆయన ఆత్మకి శాంతి కలిగించినట్టు. ఇంతకు మించిన వివరణ ఇక్కడివ్వను.. వెండితెర మీద ఇస్తా..
-మీ ఆర్జీవీ
అంటూ వర్మ చాలా తీవ్రంగా వ్యాఖ్యానించారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
