యమహా ఎఫ్ జడ్ సీరిస్‌లో సరికొత్త బైకులు...గతంలో కంటే తగ్గింపు ధరల్లో
యమహా ఇండియా డీలక్స్ శ్రేణి ఎఫ్ జడ్ సిరీస్ బైకులను మార్కెట్లోకి ఆవిష్కరించింది. వీటి ధరలు రూ.95 వేల నుంచి రూ.97 వేల వరకు పలుకుతాయి. ఇక ఎఫ్ జడ్ -25, ఫేజర్ -25 మోడల్ మోటారు సైకిళ్లు రూ.1.33 లక్షలు, రూ.1.43 లక్షలకు వినియోగదారులక అందుబాటులోకి రానున్నాయి.
న్యూఢిల్లీ: ప్రముఖ ద్విచక్ర వాహన తయారీ కంపెనీ యమహా మోటార్‌ ఇండియా తన ఎఫ్ జడ్ సిరీస్‌లో రెండు సరికొత్త బైక్‌లను సోమవారం మార్కెట్లో విడుదలచేసింది. ఎఫ్ జెడ్‌–ఎఫ్1, ఎఫ్‌జెడ్‌ఎస్‌–ఎఫ్1 పేర్లతో ఆవిష్కరించిన ఈ బైక్‌ల్లో అధునాతన బ్రేకింగ్‌ వ్యవస్థ, యాంటీ లాక్‌ బ్రేకింగ్‌ సిస్టమ్‌ (ఏబీఎస్).. 149 సీసీ 4–స్ట్రోక్, సింగిల్‌ సిలిండర్‌ ఇంజిన్ తదితర వసతులు ఉన్నాయి. ఈ బైక్‌ల ధరల శ్రేణి రూ.95,000–రూ.97,000గా నిర్ణయించినట్లు కంపెనీ తెలిపింది.ఈ సందర్భంగా కంపెనీ చైర్మన్‌ మెటొఫుమీ షితార మాట్లాడుతూ ‘రెండు నూతన బైక్‌ల విడుదల ద్వారా డీలక్స్ క్లాస్‌లో సంస్థ మార్కెట్ వాటా మరింత పెరగనుందని భావిస్తున్నాం’ అని పేర్కొన్నారు.
ఎఫ్‌జడ్- ఎఫ్1 మోడల్ బైక్.. మెట్రిక్ బ్లాక్, రేసింగ్ బ్లూ కలర్స్‌లో, ఎఫ్‌జడ్ఎస్- ఎఫ్1 తరహా బైక్ మాట్ బ్లాక్, డార్క్ మాట్ బ్లాక్, గ్రే అండ్ క్యాన్ బ్లూ రంగుల్లో వినియోగదారులకు అందుబాటులోకి రానున్నది. వైజడ్‌ఎఫ్-ఆర్15 వర్షన్ 3.0తోపాటు ఏబీఎస్‌తో కూడిన ఎఫ్‌జడ్- ఎఫ్1 బైక్‌నకు కొనసాగింపుగా ఈ రెండు బైక్‌లను యమహా మార్కెట్లోకి విడుదల చేసింది.
వీటితోపాటు యమహా ఇండియా భారత్ మార్కెట్లోకి ఎఫ్ జడ్25, ఫేజర్-25 మోడల్ బైక్‌లను కూడా ఆవిష్కరించింది. ఈ రెండు బైకులు కూడా 249 సీసీ ఇంజిన్ సామర్థ్యం, డ్యూయల్ చానెల్ ఏబీఎస్ కలిగి ఉన్నాయి. ఎఫ్ జడ్ -25 మోడల్ బైక్ ధర రూ.1.33 లక్షలు కాగా, ఫేజర్-25 ధర రూ.1.43 లక్షలు పలుకుతోంది. ఎఫ్ జడ్ 25 మోడల్ బైక్ మాట్ బ్లాక్, క్యాన్ బ్లూ, డార్క్ మాట్ బ్లూ, ఫేజర్ -25 బైక్ డార్క్ మాట్, మెటాలిక్ బ్లాక్ రంగుల్లో వినియోగదారులకు అందుబాటులో వస్తాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
